💓Papa ka dil koi aam jagah nahi hoti

Wo so jaate hai ,unki chintaae kabhi nahi soti

Hamari fikra unke dil ko iss tarah gher leti hai

Ki unki apni icchaae bhi unse muh fer leti hai

Kuch toh thik nahi tha koi baat toh thi unke andar thehri

Papa ka dil aur uss dil ki hogai thi bypass surgery

Uss baat ne humara dil bhi tod diya tha

Unke dil ne kiss tarah unka sath chhod diya tha

Unke dil ki nasso mei khoon kuch kam behne laga tha

Apni dabi khwahisho ko bahar nikaalo,wo bhi ab yahi kehne laga tha

Dil mei kitni hi baate simati thi, kitna bojh tha uss chhote se dil par

Kabhi unka dard mehsoos hi nahi hua,wo baat hi karte the hamesha hass kar

Jo nahi kar sakte the wo bhi humare liye kiya aur kabhi nahi jataya hoga

Apne dil se apni khwahisho ka hissa hi kaat kar hatwaya hoga

Unke seene ke beecho beech reh gaya hai gehra sa nishaan

Aadat acchi nahi thi unki chhupa ke rakhne ki apne armaan

Unka wo nishaan aaj bhi aankh bhar kar nahi dekh paati hu

Bass jab bhi unse milti hu unke gale lag jaati hu

Iss zindagi se unhe bhi toh koi na koi shikayate rahi hogi

Humse chhupa kar na jaane unhone kitni takleefe uthai hongi

Wo dil jaha sirf humaari ichhaao ne ghar banaya tha

Uss dil ka dard na humne suna na unhone kabhi sunaya tha

Papa kabhi toh apni khwahisho ko saamne laaiye

Kabhi toh kahiye ki mujhe apne liye bhi kuch chahiye

Uss dil ko itni takleef mat do papa,uska dhadakte rehna bohot zaruri hai

Kyunki aapke bina hum aur humari zindagi bilkul adhuri hai